KANGIATA ILLORSUA

Atuartitsinermi atortussani sammisat amerlaqaat soorlu pinngortitamik ilisimatusarnermik kulturimillu oqaluttuarisaanermik allaat imaqarlutik faginillu tapitariissitsilluni ingerlanneqartussatut suliarineqarsimallutik, taakkunanilu Ilulissani Kangiata Illorsuani ”Sermeq pillugu Oqaluttuaq” pillugu saqqummersitami ilisimasat tamarmik ilanngunneqarsimallutik.

Kangiata Illorsuani saqqummersitsineq ilisimatusarnermi paasisanik nutaanik tunngaveqarpoq Kalaallit Nunaannilu, Danmarkimi USA-milu ilisimatusartunit pikkorinnerpaanit arlalinnit suliarineqarsimallutik, sammisallu Kangiani Qeqertarsuullu Tunuani pinngortitap kulturilllu immikkuullarissup oqaluttuarisaaneranik aallaaveqarlutik.

Taamaattumik atuartitsinermi atortussanit Nunatsinni Ilisimatusarnermik Siunnersuisoqatigiiffiata periusissiaa nutaaq malinneqarpoq, tassa Kalaallit Nunaanni ilisimasat pilersinneqartut Kalaallit Nunaanni inuaqatigiinnut iluaqutaanissaat.

”Tupinnaqaaq atuartitsinermi atortussani ilisimatusarnerup ilinniarnerullu akuleriissinneqarnerat,” oqarpoq Andreas Peter Ahlstrøm, GEUS-mi Sermersiornermik Silallu Pissusianik Immikkoortortaqarfimmi siunnersortit pisortaat.

Atuartitsinermi pilersaarusiat 68-it taakku immikkuullarissut meeqqat atuarfiani nukarlernut, akullernut angajullernullu kiisalu Ilinniarnertuunngorniarfimmi ilinniartunut aaqqissorneqarsimaput ungasissumiillu atuartitsinermi akuleriissumillu ilinniarnermik maligassiuisunit inerisarneqarsimallutik.

Atuartitsinermi atortussat tamanut atortussiaapput Kangiatalu Illorsuata Ilinniarnermik isaaffianut inissinneqarsimallutik.

Ilinniartitsisumut ilitsersuutit ilinniartitsinermilu atortussat tamarmik kalaallisut, qallunaatut tuluttullu suliarineqarsimapput. Taamaalilluni ilinniarnermik isaaffiup Kalaallit Nunaat pillugu ilisimasanik qallunaat atuarfeqarfianni Nunarsuarmilu sumi tamani atuartut tuluttut piginnaasaqartut maannakkut pisariaqartitsinerat tunngavigalugu siammarterinermut peqataasinnaanera aamma isumannaarneqarpoq.

Attaveqarfissaq: Kangiata Illorsuata pisorta, Elisabeth Momme e-mail: elisabeth@ifc.gl Mobil: +299 555588

Ilisimasanik pilersuisut

Pinngortitaleriffik aamma Silap Pissusiani Ilisimatusarfik, Nunatta Katersugaasivia Allagaateqarfialu, Niels Bohr Instituttet, DTU, GEUS, DMI; Danmarks Nationalmuseum, Statens Naturhistoriske Museum, National Snow and Ice Data Center, New York University, Københavns Universitet, Arktisk Institut aamma nunaqavissut immikkut ilisimasallit.

Atuartitsinermi pilersaarusinik atortussanillu ineriartortitsineq

Anholt Læringsværkstedimi Lotte Brinkmann aamma Daniella Manuel – ungasissumit ilinniartitsinermi akuleriissilluni ilinniartitsinermi atuarfeeqqani avinngarusimasuni kiisalu Kalaallit Nunaanni, Tanzaniami Qallunaat Nunaannilu qeqertaaqqani angerlasimaffimmi atuartitsinermi maligassiuisut. Atuartitsinermi atortussat tamarmik Ilulissani atuarfiit suleqatigalugit misilittarneqarsimapput.

Kangiata Illorsuani Ilinniarnermik isaaffimmut ugguuna isersinnaavutit www.isfjordscentret.gl/da/laeringsportalen.

Ilinniartitsinermi atortussat akeqanngillat, kisianni Kangiata Illorsua piginnittussaatitaavoq